Content Preview: rss
226 days ago
لا تنتظر كلمة ... أيمكن وصف السماء بكلمة زرقاء؟؟ .... هل الوردة جميلة ... فقط جميلة ؟ أغمض عيناك و تخيل انك في السماء بعيدا.... عن كل شيء وقريبا منى... تخيل ... ارسم ... اسمع ما اشعر به .... اشعر بداخلي بشروق ... بموسيقى ... بأمل ... بألوان ... وبطفلة سعيدة هل يمكن وصف ما بداخلي بكلمة احبك...أعشقك ...فقط ؟ لا تنتظر كلمة....
415 days ago
ياااااااااه رجعت هنا تانى شعور غريب بالالفة والاغتراب..... الفة ناحية المكان دة اللى كان فى يوم كل العالم بتاعى وان فى حاجات كتير لسه زى ماهى مها لسه رقيقة وصريحة بلاقى فى حاجات كتير من اللى بتقوله انا نفسى اقوله وحاسة بيه جدا ومنى لسه بتكتب كل حاجاة بتحس بيها... حتى لو انا مستغربة اللى هيا كاتباه لكن الاغتراب دة جوايا انا ... مش لاقيه اي حاجة هنا مش مستغرباها... مستغربة ان انا كنت هنا من سنين...وانى كتبت حاجات دلوقتى مش لاقياها على لسانى خالص لو انا كنت من سنة او اكتر مش عارفة احلم او اضحك يبقى انا دلوقتى ايه ... ميتة؟؟؟ انا بمر بمرحلة غريبة ... دلوقتى ما بقتش فاهمة نفسى ولا الناس انا فعلا صح ونقية اوى على المجتمع دة وهما اللى غلط علشان كدة انا مش فاهماهم ولا انا اللى ضعيفة وهما كلهم صح ... ودى التعاملات الطبيعية بين الناس خد وهات .... فى مصلحة اعاملك كويس مفيش... ولا اسال فيك انا شايفة العالم دلوقتى غابة وانا خايفة حتى ادخل فيها بشوف احلامى بتضيع مش عارفة هيا بتضيع من الظروف ولا من ضعفى مابقتش عارفة نفسى حاسة ان ماشية وشايلة علامة استفعام ...
837 days ago
بسم الله الرحمن الرحيم النهاردة عيد ميلادى بجد دى كارثة انا بكره اليوم دة جدا يعنى ... ظاهريا ببقى فرحانة ومهتمة ومستياه بس ببقى مستنياه علشان يعدى كل سنة بقعد مع نفسى واسأل ... ياترى انا راضية عن نفسى ..؟؟ عرفتها ...؟؟؟ حققت كل اللى انا عايزاه..؟؟؟ علاقتى بالناس كويسة وعلاقتهم بيا كويسة ...؟؟؟ يعنى علاقات صحوبية ولا للمصلحة بس..؟؟ المشكلة ان كل سنة بتبقى الاجابة ب (لا) وانا متأكدة ان السنة دى هتبقى كدة برضة وعارفة الاجابة دى من عيد ميلادى اللى فات كنت متأكدة ان مفيش حاجة هتتغير فى خلال سنة ولا ممكن اكون عرفت ان مفيش حاجة هتتغير للابد....... اصعب حاجة فى الدنيا انك تعرف نفسك وامكانياتك ... افتكر انك لو عرفت نفسك عمرى ما هتندم على فرص ضاعت او تزعل من تصرفات حد ما يهمكش او مش قريب منك لانك لو عارف نفسك هتعرف هل كلامه دة صح ولا غلط ... مش هتقعد تضايق وتزعل وتتصدم المشكلة بقى انى كملت 21 سنة ياه انا بقى حاسة انى عشت 11 سنة بس عندى ملل من الحياة كان عندى 41 سنة بجد كلام مش منطقى بس دة اللى حاساه حاجات كتير راحت نفسى اصلحها ...
846 days ago
بسم الله الرحمن الرحيم السبيس دة شاف تغيرات كتيرة فى ارائى وفى عقلى وفى حالتى النفسية من حيث التشاؤم او التفاؤل حتى افتكر ان شكله اتغير كتير والاهم ان توجهاته اتغيرت اكتر ساعات كنت بحس انى عايزة انقل مقال معين عجبنى وساعات كنت بيبقى جوايا فكرة عايزة اوصلها وساعات تانية ببقى بس عايزة اتكلم واحيانا كنت بدخل اشوف بس ردودكم وكلامكم الجميل مش عارفة هل التغيرات دى كلها بتأكد انى معرفتش اعبر عن شخصيتى هنا ولا ان شخصيتى اصلا كدة متقلبة وملولة افتكر ان الاحتمال الاول افضل لكن التانى هوا اللى غالبا صح المهم انا النهاردة حاولت اغير حاجات كتير فى الاسبيس ومسحت حاجات واضفت او هضيف شوية حاجات كمان هه يارب يعجبك ويعجبنى ويارب اوصل بيه لشكل كويس وشكرا لكم جميعا
