Content Preview: rss
445 days ago
從來都唔覺得自己係中國人而感到驕傲,甚至覺得有d討厭,重會話我係香港人唔係中國人想同佢有一段距離,但從512四川大地震開始我改觀啦,睇到同胞點去拯救同胞去幫佢地果刻真係好感動.到8/8京奧無與倫比的開幕,簡直令中國人係世界上既地位提升左唔小,接住果16日既比賽好多時都係中國既天下,而我好多時放左工就返屋企睇奧運,哈哈慳左唔小錢,而我亦係lei個奧運終於知道中國國歌點唱,閉幕雖然唔及開幕好但京奧已經成為我心目中最好既奧運,而京奧閉幕之後個幾日有d失落同空虛好似差咁d野.今日殘奧開幕中國同香港運動員加油.
498 days ago
13/7果日去左何文田唔知叫咩既草地足球場度當更.去之前已經問左直哥果度環境點架啦~因為佢前個禮拜已經有去.點之都出事.一去度見到係草地已經心知不妙.因為一直我都以為係硬地球場做馬術演習.重要果日係去做helper所以唔駛著u著自己衫.加上連日黎既大雨可以想像到個場會係點!?一踩落個場度立刻叫左出黎對鞋冇啦....跟住心痛...然後後悔點解頭先响HQ唔係locker攞返啊公對鞋黎換咁咪冇咁傷囉~一路嗌笨一路踩落d泥氹度....又要搬搬抬抬...又要起營....又要喂蚊....重要搞到成身勁污漕.....成隻泥鴨咁~之後就係度諗都唔明點解d男仔咁鐘意踢波搞到成身都污漕立撻有乜為?!不過黑極重有~d雨遲唔落早唔落編編去食飯先黎落大雨.個袋擺左响HQ所以冇遮.3個人用一把遮搞到成身濕晒去食飯.感覺極差.......食完飯返去有段空檔,d senior既member拍左個demo.勁搞笑叫左2個member用張顫遮住做隻馬.我就係度影下變做泥鴨既罪證影,雨後既天同埋demo&隻馬.之後下午既演習又開始啦~搞到6點幾終於走得啦.....拿拿淋返屋企沖涼瞓覺.雖然搞到成身污漕立撻,不過都學到d野,同埋今次真係有血有汗唔易賺...哈哈~
498 days ago
由6月尾開始就過得好充實,尤其係星期六日.30/6個日同恩去左剪頭髮.之後會合vivian,另一個恩同輝輝行左陣,諗諗下得輝輝一個男仔驚佢會悶臨時打比西芹叫佢出黎食飯佢又得喎,我地一行5人係朗豪坊等西芹.7點幾終於出到黎啦.....西芹打比輝輝問我地响邊點知輝輝將魚米家講左魚家米大家就响度喪笑.就係咁就變左大家既terms啦.lei個都唔係咩問題,最大問題係同西芹講响4樓等佢走左上去11樓既魚米家,搞咩呀完全錯晒.哈哈等到佢返落黎會合大家就去左潮樓食飯.唔知係咪太開心既關係大家好似唔識飽咁...食完飯重要係咁叫甜品食.係潮樓食完都唔夠重去埋石磨坊食.個個食到好飽好滿足咁返屋企. 5/7同西芹啊棟興祝生日去左Neway唱k,果晚西芹當然成為目標不斷比人隊(雖然平時佢都係目標)哈哈...大家玩到2點有d唔係好夠喉,之後要走既就走未玩夠既就上左個fd公司繼續玩...玩左陣之後大家就靜左落黎傾下計.因為佢地實在太耐冇見要聚下舊.到左差唔多5點大家都開始疲啦...得返我同輝輝响度傾計其他既都瞓晒lu~因為西芹返8點所以大家就等到7點半一齊走.返到去搞下lei樣搞下個樣瞓落床都已經9點半.以為有覺好瞓啦...點知12點半就比屋企對面既龍舟比賽呀~嘉年華呀~嘈醒左.救命呀......個刻真係想炸左對面個公園同個海.之後又瞓唔返結果成日就係度唔知做緊咩個頭又痛呆下呆下呆足成日.到夜晚6點幾先瞓得返.lei一瞓就瞓到第二日8點幾起身返工.爽~ 7/12個日放左工返屋企眠左陣就同華姐出左去游水,佢要學游水同埋松鼠人响個度當更就係咁去左摩hill,好耐都冇係訓練池游啦~感覺有d唔慣,不過冇所謂當陪華姐.最後我都可以去標準池度游左300m好滿足~因為前個日去左打kick boxing都未recover所以300m已經好足夠.夜晚就同佢去左數碼港睇戲.回程個陣我同華姐行返華富响學校門口撞到啊撻同佢傾左陣就上左華姐屋企,因為有個2年幾冇見既fd上去佢屋企同佢擦鞋,早知我拎埋我個對比佢搞啦....不過我已經同佢講左下次會比埋我個對佢擦...哈哈~傾左陣我就返屋企,因為第二朝要好早起身去當更.好耐都冇試過有咁大既運動量啦...重要係連續3日.做完運動出一身汗既感覺超正!!!
594 days ago
自從媽咪 3 月頭入左院做手術之後 , 好耐都冇去過街啦 . 佢做手術果日簡直就係我有生之年過得最漫長既一日 . 朝早 7 點幾去到醫院打點好一切 ,8 點同佢去手術室之後就返工 , 一路做野一路望住個鐘 , 等下一個鐘等下又一個鍾 , 點解重未有電話到 ?lei 一等就等到零晨兩點 , 足足 18 個鐘 . 响 lei 段時間裏面簡直就係人間地獄,腦袋一片空白.......直至醫院打黎先放下心頭大石 ..lei 1 個月既活動範圍離不開醫院 , 屋企同公司 , 除左 lei3 個地方外就再冇第 4 個地方 , 每日放工就趕去醫院 . 放假瞓醒就整野比媽咪食跟住就去醫院 , 跟本就冇時間去街 , 不過我從冇任何怨言 . 因為見到佢虛弱既身體 , 好辛苦,好痛但你又乜都做唔到又幫唔到 . 果種感覺真係又難受又心痛 , 尤其係岩岩做完手術响 icu 入面個日 , 見到佢我差 d 忍唔住喊左出黎 , 成身插晒喉 , 真係好心酸 . 不過見佢一日比一日好都放心左 d, 雖然有時都反覆 , 但係醫生話已經過左最危險既時間應該冇乜大問題 . 終於明白點解 d 人話病人成個細路仔咁 ..... 佢一見到我就响度扭計 , 又 lei 樣又果樣 , 有時對住佢真係心力交瘁 , 不過冇計 , 鬼叫佢係我媽咪咩 , 幾辛苦都要照顧佢 . 哈哈 4 月 4 號可以出院啦 ..... 真開心 . 不過 4 月尾又要返入去做手術攞返條喉出黎 . 希望做完 lei 個之後就唔駛再做啦 ....... 成個月冇出個去 ,4 月 6 號同亞恩去左尖咀行街 . 唔知係咪大耐無出去有 d 唔係好慣 . 一出到去鼻敏感 , 個鼻喪痕 , 痕到想切左佢 . 成個幾鐘先冇事 , 真慘 . 食完野一行 7 人去睇張敬軒演唱會 . 開頭都係諗住去聽歌 . 但係就越睇有越驚喜 , 唱得好唔在話啦,重要成晚既氣氛都好好 . 佢同黃菀芝個 part 好正 . 我同亞恩一路睇一路話唔好係 kenny 做嘉賓唔想睇佢呀 . ...
594 days ago
3 月頭返新工感覺好好呀 ... 返工時間雖然長左 , 但係就近左好多 . 返 9:00,8:30 先起身都未遲 , 重要唔會遲到 tim, hehe. 以前返工就驚塞車遲到 , 而家就冇 lei 個問題啦 ... 因為我行路返工架囉 , haha 勁正 . 老細又好人 , 冇咩架子又肯教我 , 話晒我都係 lei 行既初哥咩都唔識 . 但係我都極度唔好意思 . 因為返工第 2 個禮拜就因為媽咪有事 , 我成日要遲返早走 , 都差唔多成個禮拜咁耐 , 好彩得我老細體諒 ,thanks so much kenny. 重因為咁我耿耿於懷左好耐 ,d 朋友都有開解我 , 同我講你都唔想架嘛亦都冇人想所以唔好諗咁多 .照顧好媽咪先, 亦都因為 lei 件事我連學都要停左先 , 幾時可以返都未知 . 响 lei 段時間裏面我成日都做錯野 , 錯到連我自己都覺得不可原諒 . 雖然真係咩都唔識 , 但係 lei 個唔係籍口 , 小心 d 咪唔會錯囉 . 做錯野我老細冇話我 d 咩 , 但係有時因為我做錯野而忟憎 .但 都只係會講小心 d 啦 , 唔好再錯啦 . 知道收到我會盡量減低出錯架啦 ...sorry!!!
